ԼՂՀ մշակույթի և երիտասարդության հարցերի նախարարության աջակցությամբ, Շուշիի մշակույթի և երիտասարդության կենտրոնում  ու Ստեփանակերտի մշակույթի և երիտասարդության պալատում ցուցադրվել է Հովհաննես Թումանյանի «Անբան Հուռին» հեքիաթի հիման վրա նկարահանված  համանուն կարճամետրաժ մուլտֆիլմ-մյուզիքլի (բեմադրող ռեժիսոր և սցենարի հեղինակ՝ Արթուր  Միքայելյան) արցախյան պրեմիերան, որին ներկա է գտնվել նաև ֆիլմի ստեղծագործական խումբը: Այս մասին հայտնում է ԼՂՀ մշակույթի նախարարությունը։

Ֆիլմը պատմում է անբան Հուռիի զվարճալի արկածների մասին, ում մայրն ամուսնացրել է առևտրականի հետ: Մինչ ցուցադրությունն անդրադարձ եղավ նաև ֆիլմի ստեղծման ստեղծագործական ընթացքին: 4  տարվա աշխատանքից հետո «Անբան Հուռին» մեծ էկրան է բարձրացել հունիսի 1-ին: «Մուլտարտ+» ստուդիայի և Հայաստանի ազգային կինոկենտրոնի համատեղ նկարահանած կարճամետրաժ  անիմացիոն ֆիլմը կցուցադրվի նաև Մարտունում, Հադրութում, Ասկերանում և Մարտակերտում: